НОВИ САД – Скупштина Войводини вчера розпатрала ребаланс покраїнского буджету за 2017. рок, з чим вецей як 2,5 милиярди динари буду видвоєни векшином за нови инвестицийни укладаня.
Пред схадзку Скупштини Войводини предсидатель Покраїнскей влади Иґор Мирович новинаром виявел же з ребалансом буджету три штварцини средствох опредзелєни за нови инвестициї, а найзначнєйши буду укладаня до локалних самоуправох и їх локалного економского розвою, до здравственей системи у Покраїни и нових обєктох за образованє.
– Прейґ Управи за капитални укладаня вецей як 1,2 милиярди динари буду унапрямени за локални економски розвой у локалних самоуправох по новим конкурсу. Тиж ше будзе робиц и на инвестицийним отримованю и осучасньованю клїнїкох и шпитальох по цалей Войводини – гварел Мирович, визначуюци же прейґ Секретарияту за польопривреду значни средства достанє и ЯП „Води Войводини”.
– Вельки инвестициї буду унапрямени и на реконструкцию предшколских установох, основних и штреднїх школох. З ребалансом буджету 250 милиони динари буду уложени до вецей як 500 основних и штреднїх школох, прейґ конкурсох – гварел Мирович, толкуюци же слово о вецейрочним проєкту кординованим з Канцеларию за явни укладаня.