КОЦУР – Внєдзелю, 4. новембра, у Подручней лиґи Суботица одбавене 12. коло у котрим коцурска „Искра” на домашнїм терену дочекала екипу „Виноґрадар” зоз Гайдукова и победзела ю зоз резултатом 4:1.
Змаганє медзи „Искру” и „Виноґрадаром” було означене як дерби кола, понеже ше стретли трецопласована и штвартопласована екипа у лиґи.
Два ґоли за „Искру” на тим змаганю дал Радован Ґаґович, а Дамян Ґубаш и Здравко Живкович дали по єден ґол.
После 12 одбавених колох „Искра” ше находзи на трецим месце на таблїчки зоз 28 бодами, кельо ма и другопласовани „Пролетер“ зоз Равного Села, а першопласована „Войводина“ зоз Бачкого Ґрадишта ма лєм єден бод вецей.
На нєдзелю „Искра“ будзе госцовац у Дюрдїну дзе ю дочека истоменова екипа.