РУСКИ КЕРЕСТУР – У Хорскей сали Дому култури вчера, 6. марца, у Руским Керестуре перши раз отримани Осмомарцовски концерт школярох керестурского Оддзелєня Школи за основне музичне образованє (ШОМО) з Кули.
Як наглашела директорка ШОМО Лїляна Барна Никитович, указала ше потреба и у Керестуре отримац концерт з нагоди Дня женох, як цо ше таки концерти традицийно отримує у Кули.
Шицки тогорочни концерти ШОМО и у знаку акциї превентивней борби процив насилства медзи парняками, з меном „Потримай свойого товариша”. Директорка наглашела же їх форма борби то писани порученя школярох своїм товаришом, як потримовка за наступ на тих концертох.
На Осмомарцовским концерту у Керестуре наступели 24-еро школяре од пририхтуюцей по пияту класу на инструментох хтори виучую, а то клавир, тамбура прим, гармоника, тамбура басприм и кларинет. Перши раз явно наступели пецеро школяре з пририхтуюцих класох.
Два шпиванки одшпивал хор младших школярох, з провадзеньом наставнїка Ладислава Тамашия, а школярох за наступ пририхтали їх наставнїки Мирон Сивч, Геленка Гарвильчак, Славко Орос и Таня Орсаґ, док корепетиторки були наставнїци Ева Епер и Снежани Ґавранов.
