ВЕРБАС – По конєц лєта буду окончовани розгварки за роботу оператера у продукциї у новосадским погону компаниї „Лир”.
Придаванє документох и интервюи за роботу орґанизовани каждого пондзелку, од 16. юлия, у Сали за схадзки на першим поверху у будинку Општини Вербас. Розгварки ше окончую помедзи 16 и 18 годзин.
Як сообщене з Општини Вербас, локална самоуправа орґанизовала тоти интервюи за роботу и понукла кажду потребну помоц компаниї, прето же жада проактивно робиц на зменшаню нєзанятосци, и источасно обезпечиц нагоду своїм гражданом же би чули о якей роботи слово и можлївосц же би єдна часц з нїх и достала роботу.
У тей хвильки „Лир” глєда оператерох у продукциї дзе ше продукую електрични кабловски снопи, а Вербащанє пондзелками буду мац нагоду чуц праве о тих позицийох, алє и о условийох обезпечованя роботи, условийох роботи, плаци и бенефицийох.
Гражданє на истим месце буду мац можлївосц придац свойо документи и окончиц интервю за роботу.
Як сообщене з Корпорациї „Лир”, компания ґлобални продукователь шедзискох и електричних системох за авта, а тиж так є и значни добавяч вельких шветових продуковательох превозкох, до чиїх погонох часци з новосадского погону муша буц на час випоручени.
Прето компаниї значне пренайсц добрих роботнїкох и понукнуц им добри условия за роботу: роботу на нєодредзени час, обезпечени превоз по роботу, можлївосц напредованя у компаниї, як и заробки и бонуси у согласносци з особнима резултатами роботи.
апм/ядю
Иншак, „Лир” у Новим Садзе дїлує од 2016. року, продукция на 29 тисячи квадратних метерох у новосадскей Роботней зони Сивер IV. Тераз у фабрики роби коло 3 тисячи роботнїки у продукциї, машинских технїчарох, технїчарох електронїки и инжинєрох.