РУСКИ КЕРЕСТУР – Школяре трецей класи ОШ „Петро Кузмяк” вчера були домашнї парняком з III-7 оддзелєня ОШ „Жарко Зренянин” з Нового Саду и їх учительки Мариї Ранич. Як гварела за Рутенпрес, тота нащива би мала буц початок сотруднїцтва двох школох.
Нащива новосадских школярох витворена на предкладанє дакедишнього наставнїка у керестурскей Школи Михайла Фейдия, чий унук Матей школяр спомнутей новосадскей школи и котри своєй учительки и парняком вельо приповедал о Руснацох, наших обичайох и керестурскей Школи.
Госцох привитала директорка Школи Хелена Пашо Павлович, а домашнї им були парняки, з учительку Наду Колошняї и педаґоґиня Мария Шанта. У своєй класи им пририхтали кратку програму, на хторей шпивали, рецитовали и ґлумели по руски и сербски, а на концу у школским голу шицки вєдно танцовали.
Домашнї и госци нащивели и валалске ґаздовство Якима и Меланиї Чижмарових (Русових), чия унука тиж школярка спомнутей трецей класи, дзе могли видзиц велї домашнї животинї; нащивели и Спортску галу, Замок, Музейну збирку и Катедралну церкву св. Миколая.
На концу були госци у спомнутого Фейдия, котри продукує ягоди, та их оберали и коштовали.
