НОВИ САД – Городска Комисия за означованє шветох Скупштини Городу Нови Сад поволує шицких заинтересованих же би по 15. септембер поднєсли прияви-предкладаня за додзельованє Октоберскей награди, а по 1. октобер за додзельованє Новемберскей грамоти за 2017. рок. Прияви треба доручиц на адресу: Скупштина Городу, Жарка Зренянина 2.
Октоберску награду ше додзелює з нагоди означованя 23. октобра, Дня ошлєбодзеня Нового Саду у Другей шветовей войни, за посцигнути винїмково успихи у науки, култури и уметносци, публицистики и новинарстве, архитектури и будовательстве, розвою нових технолоґийох, просвити, спорту, защити животного штредку, здравстве и гуманитарней роботи, поведзене у сообщеню.
Октоберску награду можу достац и школяре и студенти, як поєдинци, лєбо ґрупа за заєднїцки витворени резултати у наукових, чи уметнїцких роботох, як окремну форму дружтвеного припознаня за творчосц младих на териториї городу.
Новемберску грамоту ше додзелює гражданом поєдинцом и ґрупом за пестованє демократских традицийох и змоцнєнє заєднїцтва гражданох и гражданкох Нового Саду, за привредни розвой, духовну творчосц, здравствену и социялну защиту, просвиту, гуманитарни активносци, спорт и указану шмелосц у позарядових ситуацийох, виявене з Комисиї.
Новемберску грамоту ше додзелює з нагоди 9. новембра, дня кед сербске войско ошлєбодзело Нови Сад 1918. року, и з нагоди 25. новембра 1918. року, кед Велька Народна Скупштина Сербох, Бунєвцох и других Славянох у Бачкей, Банату и Баранї принєсла Одлуку о присоєдинєню Войводини ґу Кральовини Сербиї.