НОВИ САД – Манифестация „Под корунами на Штранду”, котра почала 16. юлия, а будзе тирвац по 11. авґуст на новосадкей плажи Штранд, на пондзелок почина з роботнями у котрих дзеци од 5 до 12 роки буду учиц по руски.
Роботнї ше буду отримовац кажди роботни дзень од 19 до 20 годзин у библиотеки на Штранду, а у нїх маю право участвовац дзеци котри нє знаю бешедовац по руски, а жадаю ше упознац з руску културу. През цалотижньово активносци и бависко дзеци науча коло 100 слова, а кельо научели буду мац нагоду превериц у соботовим квизу. Консултант за руски язик будзе Блаженка Хома Цветкович.
Од початку тогорочней манифестациї уж отримани роботнї ученя мадярского и румунского язика, а после тижня руского, годно научиц и знаковни язик.
Шести рок зашором Городска библиотека у Новим Садзе, Герор Медия Понт и Центер за розвой меншинских и локалних медийох орґанизую тото збуванє котре промовує язики националних меншинох, културу и обичаї меншинох котри жию у Войводини.