РУСКИ КЕРЕСТУР – У Марийовим святилїщу Водици на ютре, 5. авґуста, на 10 годзин будзе служена одпустова Служба Божа, а на нєдзелю на швето Преображенє у Водици будзе Служба на 11 годзин и закончи ше Водицов камп за дзеци и младих.
На ютре 5. авґуста у римокатолїцкей Церкви швето Шнїговей Мариї, и Кирбай у базилики Мария Маджоре у Риме зоз хтору Водица у заєднїцтве од прешлого року. Прето и у Водици першираз будзе Служба Божа на хторей вирни годни достац и полни одпуст понеже Водица од влонї и тирваце одпустове место.
На нєдзелю, у рускокерестурскей парохиї, припада и швето Преображенє Господнє та попри Службох Божих у Катедралней церкви на 8 и 19 годзин, Служба Божа у Водици будзе на 11 годзин, а там будзе и пошвецанє овоци, специфичне за тото швето.
Зоз тоту Службу Божу у Водици закончи ше и тогорочни Водицов камп за младих хтори там тирва од 3. авґуста и на хторим приявени 70 учашнїки, а вєдно зоз орґанизаторами на нїм були коло сто особи.