НОВИ САД – Од нєшка, та по 19. марец, у Гали 1 на Новосадским сайме будзе Саям опреми за риболов и активне пребуванє у природи, на хторим ше представя вецей як 80 викладателє.
У отвореней часци Сайму будзе орґанизовани спортско-рекреативни парк за шицки возрости, у рамикох хторого буду презентовани и екстремни спорти. Нащивителє ше годни опробовац на Фитнес-полиґону, у глєданю блага, на штучней стини за пендранє, на полиґону за цильованє, та полиґону за бициклизем. Медзи иншим, будзе орґанизоване и бициґлистичне обегованє за дзеци, а главна награда бициґла.
На Сайме буду отримани и преподаваня и едукациї о Закону о спорту, антидопинґу, Правилнїку о шицких дисциплинох, протоколу о членстве у Союзу, фаховим оспособйованю за роботу у спорту итд.
Рибаре-рекреативци годни участвовац на интерактивних трибинох Риболовецкого союзу Войводини на хторих будзе представена анализа рибного фонду у рикох у Войводини, а будзе бешеди и о нових законских реґулативох.
Саям годно нащивиц од 10 до 19 годзин, цена поєдинєчней уходнїци 200 динари, а карти за колективни нащиви (за пейц и вецей особи) коштаю 150 динари. Нащивителє котри купя уходнїци участвую и у наградним бависку.
На соботу, 18. марца, на Сайме будзе Фемелийни дзень, кеди родичи з дзецми до 16 роки заєднїцку карту годни купиц за 200 динари.