КУЛА − Вчера, 25. юлия отримана схадзка Скупштини општини (СО) Кула котра заказана по наглим поступку, понеже исновала потребе же би ше прилапело Рочну програму защити, ушореня и хаснованя польопривредних поверхносцох на териториї општини Кула за 2018. рок, цо нєобходне скорей як почнє нова аґротехнїчна сезона 2018/2019.
Рочну програму одборнїком представел Ґоран Круплянин, предсидатель Комисиї за його виробок. Медзи иншим, поведзене же поверхносци державней жеми котру ше дава под аренду у општини Кула виноша 6 010 гектари, а плановани тогорочни приходи по тей основи, вєдно зоз средствами котри пренєшени з прешлих рокох буду виношиц 145 милиони 140 тисячи динари.
Пред одборнїками на дньовим шоре було и прилапйованє Одлуки о преношеню правох хаснованя на здравстевним обєкту специялистичних службох з пасарелу и трафостанїцу, з Општини як снователя и софинансиєра на Дом здравя Кула.
З тей нагоди предсидатель Општини Велибор Милоїчич визначел же потераз з општинскей каси за софинансованє вибудови нового будинку Дому здравя видвоєни 43 милиони 656 тисячи, а єден з наступних планох будзе же би ше на подобни способ укладало и до здравствених обєктох по других местох општини.
Шицки точки дньового шора прилапени з векшину одборнїцких гласох, без розправи. Так прилапена и останя точка з котру дата согласносц на вименки и дополнєня Програми дїлованя − ребаланс финансийного плану ЯКП „Комуналєц” з Кули за 2018. рок.