РУСКИ КЕРЕСТУР – Вчера, 23. марца, на Драмским мемориялє Петра Ризнича Дядї представу „Перша журка” Тодея Николетича виведла Дзецинска ґрупа Драмского студия АРТ Дому култури Руски Керестур, у режиї Ксениї Бодянец, а текст на руски преложел Владимир Бодянец.
Була то права тинейджерска представа з тему першей любови, яка блїзка и возросту младих ґлумцох, котри з лєгкосцу толковали свойо улоги. Пребиваюци ше през хлопско-женски реваншизем, любов заш лєм превладала, чому допринєсол и танєц и музика, хтори на концу обняли и розбавених ґлумцох на бини и публику у сали.
У представи ґлумя тринацецеро школяре – Желько Сопка, Павле Венчельовски, Ребека Семан, Себастиян Надь, Марина Надь, Иван Рац, Мая Няради, Матей Шепински, Ана Костелник, Леонтий Сивч, Ванеса Новта, Дарко Маньош и Ивана Планчак.
Режисерка Бодянцова и авторка сценоґрафиї, суфлер Сара Планчак, костимоґраф Таня Орос, музични сотруднїк и тон-майстор Михайло Бодянец, а майстор шветла Сашо Палєнкаш.
Попри керестурских дзецох, представу вчера патрели и нашо школяре з Нового Саду, Петроварадину, Дюрдьова, Вербасу, Кули и з Нового Орахова, чий приход оґрнизовал и финансовал Одбор за образованє Националного совиту Руснацох.
Вчерайшу представу патрел и селектор Општинскей смотри дзецинскей драмскей творчосци у кулскей општини Владимир Надь Ачим, з чим участвовала на Општинскей смотри.
(Вецей фотоґрафиї з представи у фото-ґалериї на правим боку сайту).