НОВИ САД – Пре розвой и змоцньованє привреди, предсидатель Покраїнскей влади Иґор Мирович и предсидатель Привредней комори Войводини Бошко Вучуревич вчера подписали Спорозуменє о сотруднїцтве тих двох институцийох.
Исти дзень Привредна комора означела 98 роки постояня и Дзень Комори, а на Шветочней академиї отриманей з тей нагоди гварене же Спорозуменє будзе главни документ на основи хторого буду плановани активносци институцийох, а на концу и витворени и циль – розвой привреди Войводини и Сербиї.
Предсидатель Покраїнскей влади Иґор Мирович гварел же Войводина убудуце муши робиц швидше, моцнєйше, амбициознєйше и витворйовац значнєйши резултати, вецей проєкти и приходи, як и робиц на твореню добрих привредних условийох.
Предсидатель Привредней комори Бошко Вучуревич наявел же тота институция шицки капацитети унапрями на тото же би постала вяза медзи привреду и администрацию, як и квалитетни лоґистични сервис у обласци привреди.