Орґанизаторе 84. Медзинародного польопривредного сайма задовольни з тоту манифестацию, бо було вецей як 130 тисячи нащивительох за шейсц днї, и зазаначене барз добре предаванє польопривредней механїзациї. Аж нєочековано успишно, предата и наручена механїзация чия вредносц коло 15 милиони еври.
Национална вистава статку була богатша як влонї, а скоро шицок виложени статок предати. Указало ше и же першираз орґанизована аукция статку бул добри поцаг.
Главну награду – трактор „беларус 82.1” достала Мария Сунайко зоз Кули, цо нашо людзе прекоментаровали же награда пришла ту дзешка, блїзко, понеже нащивительох було зоз цалей Сербиї и иножемства.
Дюрдьовчань Мирослав Рамач сервисер у „Аґровойводини” и уж дванасти раз є на Польопривредним сайме у Новим Садзе.
– Тота саямска манифестация ми здабе на прешли, з тим же гваря же є ище векша як прешлорочни – гвари Рамач. – Ми у „Аґровойводини” понукаме широку палету китайских тракторох „ЙТО” фирми, хтора найвекши продукователь тракторох у Китаю. Предаваме и чески „Зетор”, тей познатей и искусней фабрики ище од Другей шветовей войни.
Заступнїки зме, предаваме и сервисуєме тоти два файти машинох, з длугорочним искуством, з тим же и „Аґровойводина” стара, озбильна фирма, з добрим кадром у тей бранши и зоз шедзиском на Римских шанцох.
МИРОСЛАВОВО ТРАКТОРИ ВОЖА ДЮРДЬОВЧАНЄ, КЕРЕСТУРЦИ, КОЦУРЦИ..
– Нашо трактори маю и Руснаци у Дюрдьове, Керестуре и Коцуре. Искуства з тима машинами добри, попри тим, нє маю вельо електронїки, єдноставни су за отримованє, а мож их и сам оправиц – наглашел Мирослав предносци вельорочного будованя и отримованя мена єдней фирми.
По його словох, єст коло пейц роки як вше чежше предац добру машину пре рижни причини. Тераз пришли и млади ґенерациї польопривреднїкох хтори знаю роботу и знаю цо сцу купиц. Треба ше барз трудзиц коло купцох, бо конкуренция и понуканє барз вельки. Вец и купци у нє малей дилеми же цо купиц.
Правда же пенєжи вше менєй, алє єст банки хтори понукаю кредити под вигоднима условиями, а камати вше менши. Интересованє за трактори вельке, бо їх штредня старосц у Сербиї аж коло 20 роки.
– Интересованє звекшує и факт же мадярска держава своїм гражданом (односно тим хтори маю мадярске державянство), дава барз вигодни условия за набавянє механїзациї – надпомнул Рамач. – Наприклад, за трактор хтори кошта 6 500 еври, мадярска держава дава 6 500 еври безповратни средства.
Нєдавно сом ше нєсподзивал кед тот кредит достал и чловек хтори ма 65 роки – гварел Мирослав.
Мирослав Рамач
ВЕКШЕ ИНТЕРЕСОВАНЄ И НАЩИВА
Власнїк „ВОС системи” зоз Жаблю Люпка Тиркайла зоз задовольством констатовала же нащива на Сайме вельо векша як прешлих рокох и вельо векше интересованє людзох за швинярство.
– Єст два главни причини за тото – гварела Тиркайла. – Перше, цена швиньох пошла горе. Друге, держава оможлївюює рижни субвенциї, наприклад, младим малженским паром, початнїком у бизнису и за преширйованє дїялносци, и кажди себе ту може найсц на даяки способ.
Ми продукуєме нашу робу и ґарантуєме зоз квалитетом и искуством и мило ми же ше людзе врацаю ґу нам. Найвекша реклама нам кед людзе видза єдни од других нашо продукти, кед су задовольни як то випатра и функционує.
По Люпкових словох, пред трома роками нє була така заинтересованосц. Интересантне же ше зявюю велї млади людзе хтори уходза до бизнису. Вони знаю цо су, информую ше максимално кельо можу сами, алє им треба и помоц. Найчастейше ше глєда совити як дацо практично обдумац, кельо то кошта и як вихасновац знанє искуснєйших.
– Маме широку палету продуктох и важне повесц же цо купцови приоритет. Наприклад, чи дахто дума и будзе познєйше преширйовац свою дїялносц з нашима продуктами, чи ше уж на початку опредзелї за найдрагшу вариянту бизнису.
Цо ше дотика контактох на тим Медзинародним польопривреним сайме, можем повесц же маме подписани єден вельки контракт уключени до аґробизниса, на хторим зме робели мешац, а чийо законченє реализоване тераз на Сайме – задовольно заключела Люпка Тиркайла.
Жабельска „ВОС система” ДОО ма опрему за карменє швиньох, односно за прашачки, за автоматске карменє, бокси, за карменє прашатох, плочи за зогриванє на цеплу воду и струю, силоси за покарму, пластични рошти и панели за швинї. Тиж, ту и вентилацийна опрема, медзи хтору и автоматски клима компютери, як и конструкциї монтажно-демонтажни за фарми, продукцийни гали и маґацини.
У своїм понуканю, вербаски „Best & co Internacional Group” ДОО, ма польопривредни машини, атомизери, култиватори, машини за пририхтованє жеми, опрему за наводньованє, пумпи, пирскачки, плуги, розсиповачи штучного гною и хлївского гною, шеячки, шатвопририхтовачи, приключни машини, силажни комбайни, миксери за статкарство, кошачки, преси за бали, пластенїки и часци за машини.
ДЛУГОРОЧНИ САЯМСКИ ВИКЛАДАТЕЛЬ, А ТЕРАЗ ЛЄМ НАЩИВИТЕЛЬ
Єст и думаня же на Сайме треба участвовац док змоцнї куповна моц. Длугорочни викладатель на Медзинародним польопривредним сайме Керестурец Янко Семан, власнїк подприємства за цадзенє олєяркох „Семан – Експорт” того року ришел нє викладац на Сайме, алє заш лєм, нащивел тоту манифестацию и пообиходзел штанди котри го занїмали.
– Тот 84. Медзинародни саям польопривреди по моїм думаню худобнєйши, нє у смислу понуканя и викладачох котри з рока на рок єст вше вецей, алє тих цо купую. Куповна моц гражданох роками опада, а то можем повесц зоз своїх вецейрочних искуствох викладаателя на спомнутим Сайме, та и на велїх других – дознаваме од Янка Семана.
Мале фамелийне розробене подприємство цадзи олєй скоро зоз шицкого – сої, слунечнїку, та и з нєзвичайних продуктох за нашо подруче – зоз кокосу, лєну, рашки и др.
Попри цадзеня олєяркох и продукциї покарми за статок, Янко ма и иншаки плани унапрямени ґу туризму. Основну дїялносц, як гвари, нє занєдзба, прето же робота розвита, а добри глас о нїм чуц надалєко, та муштериї на продукти з олєяркох ма од вшадзи. Затераз свой успих виражує з двома сертификатами котри ма за свойо продукти – за людске хаснованє и за вивоз до Горватскей.
ШВИНЯРСТВО НЄШКА ИНШАКЕ ЯК СКОРЕЙ
– Швинярство нєшка иншаке як скорей, можеме повесц же є тераз полуавтоматизоване. Добре тото же ше нашо стари купци врацаю о рок-два, и питаю совит кед ше сцу осучаснїц и преширйовац. Ми, односно представнїки „ВОС системи”, ходзиме на терен же бизме практично видзели цо треба и кельо купец дума и може уложиц пенєжи. По догварки му и направиме тото цо сце и цо будзе функционалне – гварела Люпка Тиркайла зоз жабельскей „ВОС системи”.
Люпка Тиркайла