ВЕРБАС – Представителє Сербскей напредней странки (СНС) вчера, 1. марца, перши придали лїстину кандидатох за одборнїкох до Скупштини општини Вербас за локални виберанки хтори буду 23. априла.
На лїстини, з меном „Александар Вучич – Швидше, моцнєйше, лєпше” 36 кандидати зоз СНС и єй коалицийних пертнерох – Социялдемократскей партиї Сербиї, Партиї зєдинєних пензионерох Сербиї и Союзу войводянских Мадярох. Перши на лїстини Милан Глушац, дотерашнї предсидатель Општини Вербас, а терашнї предсидатель Дочасового орґану Општини.
Як пише портал Општини Вербас, лїстина придата з 1 300 подписами потримовки хтори, як поведзене, позберани за барз кратки час.
После єй розпатраня у чаше од 24 годзини, кед нє будзе нїяки нєправилносци, Општинска виберанкова комисия урядово преглаши лїстину кандидатох и обяви єй шорне число на локалних виберанкох.