КОЦУР – Вчера, 20. авґуста, Шаховски клуб „Омладинєц“ зоз Коцура орґанизовал традицийни, 19. Мемориялни турнир на чесц покойним предсидательом и шахистом Клуба.
Тогорочни турнир бавени и пошвецени памятки на Владимира Сабо-Дайка, котри бул побиднїк на першим орґанизованим коцурским першенству у шаху 1946. року и його синови Юлиянови Сабо-Дайковому, котри вецей як 40 роки бавел и бул член Управного одбору ШК „Омладинєц“.
На турниру участвовали 33-йо шахисти зоз Коцура, Руского Керестура, Кули, Вербасу, Бачкого Доброго Поля, Србобрану и Змаєва.
Бавело ше 15 минути по бавячу, седем кола и швайцарске компютерске парованє.
Перше место на турниру освоєл Карло Бала зоз Нового Саду, други бул Владимир Лазор зоз Кули, а треци Томислав Навратил зоз Вербасу.
Мемориялни турнир тиж бул пошвецени покойним, дакедишнїм предсидательом и бавячом коцурского клуба – Микола Москаль, Райко Шолая, Дюла Фараґо, Юлиян Русковски, Микола Барат, Славко Бокан, Желько Йовович, Срболюб Станкович, Стево Мандич, Вили Конц, Владимир и Юлиян Сабо-Дайко, Михайло Варґа и Любисав Паунович.
