БЕОҐРАД – Порядни политични консултациї медзи министерствами вонкашнїх дїлох Сербиї и України, на уровню державного секретара и заменїка министра, отримани 6. юния у Беоґрадзе.
Сербски бок предводзел державни секретар Министерства вонкашнїх дїлох Сербиї Неманя Станкович, а українски – заменїк министра вонкашнїх дїлох України Василь Боднар. Розпатрени актуални билатерални питаня и можлївосци за їх унапредзенє, насампредз у економскей обласци.
Розпатрени и широки круг питаньох у рамикох медзинародних орґанизацийох, форумох и инициятивох и догварена дальша комуникация у медзисобних потримовкох. Сербски бок виражел подзековносц за принципиєлну позицию України по питаню нєприпознаваня єднобочно преглашеней нєзависносци Косова, зоз очекованьом же Україна предлужи потримовац усиловносци Сербиї у спроцивйованю намиром Приштини за учленьованє до медзинародних орґанизацийох. После схадзки подписани и план консултацийох медзи двома министерствами вонкашнїх дїлох по 2019. рок.
У пополадньових годзинох Василь Боднар ше зишол зоз представнїками рускей и українскей дияспори у Сербиї, зоз котрима бешедовал о потребох дияспори.
На схадзки зоз госцом зоз України були предсидателє руского и українского националного совиту Славко Рац и Михал Кржачек, предсидатель Союзу Руснацох Українцох Сербиї Боґдан Виславски, предсидатель КПД „Карпати” з Вербасу Славко Барановски и подпредсидатель того дружтва доктор Деян Загорянски, предсидатель Културно просвитного дружтва „Калина” з Индїї Петро Закамаров и други.
У вечарших годзинох заменїк министра вонкашнїх дїлох України Василь Боднар и амбасадор України у Сербиї Олександар Александрович ше зишли и затримали у розгваркох зоз студентами українского язика на Беоґрадским универзитету и руководительку ґрупи проф. др Людимилу Попович, а були и госци Народней скупштини РС дзе их дочекала народна посланїца Олена Папуґа.
Додайме ґу тому же у України тераз у цеку формованє Министерства за дияспору, хторе будзе вецей уваги пошвецовац рускей и українскей дияспори по цалим швеце, а окреме у жемох дзе вона малочислена.
