СРИМ – У наших парохийох у шидскей општини найрадоснєйше християнске швето – Крачун, торжествено ше преславює з молитву новонародзеному Исусови и з пестованьом народних обичайох.
У Шидзе Саночене на Вилїю служел парох о. Михайло Режак, а як то традиция, по Саночним у Руским доме орґанизоване друженє. Служби Божо у Шидзе служени кажди дзень з нагоди швета, буду и нєшка, а вчера, на Други дзень, було и мированє.
У Бачинцох ше пред Саночним, хторе служел парох о. Дарко Рац, колядовало по обисцох, а по Саночним було друженє на парохиї. На Перши дзень швета служена Утриня, потим и Служба Божа з мированьом. Служба служена и вчера, а будзе и нєшка, на Треци дзень Крачуна.
У Беркасове и Бикичу Саночне служел парох о. Владимир Еделински Миколка, а на Вилїю у Бикичу три ґрупи виронаучних дзецох колядовали по обисцох. Беркасовски дзеци ше придружели парняком у Шидзе, з котрима ходзели по шпиваню.
У Бикичу на Вилїю по Саночним було друженє у Пасторалним центре, а нєшка, на Треци дзень Крачуна Служба Божа будзе пошвецена молитви за здравє Бикичаньох, а по Служби тиж будзе друженє у Пасторалним центре.
