РУСКИ КЕРЕСТУР – Рускокерестурска парохия св. оца Миколая вчера, 9. мая, преславела храмове швето Кирбай, дзень премесценя мощох св. Миколая з Мири у Малей Азиї до Барию у Италиї.
Ранше богослуженє було на 8 годзин, а на 10 годзин Архиєрейску Службу Божу предводзел наш владика кир Георгий Джуджар, вєдно зоз 16 священїками – 12 з нашого Еґзархату, єдним з Петровцох з Горватскей и трома священїками зоз Словениї.
У своєй казанї владика Гергий наглашел приклад св. Миколая, котри пре свою скромносц и милосердиє окреме популарни при вирних.
– Тот котри достава – наполнює свою руку, а тот котри дава – наполнює свойо шерцо – – гварел владика и поволал шицких же би робели дїла милосердия ґу ближнїм.
На Служби шпивали Мишани хор Дому култури и Катедралней церкви, з хторим дириґовала Лидия Пашо, и дзияк Янко Виславски. Євангелию читал о. Дарко Рац, а Апостол новосадски дзияк Йовґен Надь.
Владику, священїкох, монахинї, панїматки и шицких госцох и домашнїх котри пришли преславиц Кирбай привитал домашнї парох о. Михайло Малацко, котри з тей нагоди вирних поволал и же би вихасновали соботово дежурства у Водици од 16 до 19 годзин и богослуженє на 19 годзин, цо и увод за означованє ювилею – 200-рочнїци од перших зявеньох Богородици у Водици, хтори ше означи 6. юния, на Завитни дзень Русадльох.
По Служби Божей бул одпустови обход коло церкви, закончени з читаньом Євангелиї на шицких штирох бокох швета, а владика по каждим пошвецел храм и вирних.