НОВИ САД – У єденастим тогорочним чишлє новинох „Руске слово”, попри о виберанкох, рубрика „Тижньовнїк” пише и о наиходзацим вельким ювилею керестурскей Водици – 200-рочнїци перших указаньох Мариї на тим месце.
Рубрика „Нашо места” анализує у яким стану драги по наших местох после жими и яка безпечносц дзецох на интернету, а „Економия” пише о заинтересованосци парастох зоз Шиду за карменє швиньох.
„Култура и просвита” зазначела премиєру младежскей представи „Боинґ-боинґ” у Руским Керестуре, представянє руского видавательства на Медзинародним салонє кнїжкох у Новим Садзе, означованє Дня женох у Вербаше и Дюрдьове, як и змаганя на хторих участвовали и рецитаторе з наших местох.
„Мозаїк” представя Ивану Тиркайла, шминкерку з Дюрдьова, а рубрика „Людзе, роки, живот” читачох упознава з Таню Бодянец Колбас з Батлфорду у Канади и Мирославом Шантом з Дюрдьова.
На бокох „Духовного живота” тема власносц над керестурским теметовом и хто ше о нїм стара, а „Спорт” понука и розгварку з дакедишнїм рукометашом, рукометним судийом и тренером Славком Надьом Дуцом з Руского Керестура.