НОВИ САД – У трецим тогорочним чишлє новинох „Руске слово” даскельо початни боки пошвецени Националному швету Руснацох, а у пригодним напису Швето повинчовал и предсидатель НС Руснацох Славко Рац.
„Тижньовнїк” дава огляднуце на Жимску школу у Земплинскей Теплици и о активносцох наших институцийох, а „Нашо места” информую о схадзкох СО Кула, Вербас и Шид.
„Духовни живот” зазначел схадзку Церковного одбору у Ґосподїнцох и Дзецински куцик у керестурским Каритасу, док „Култура и просвита” дава огляднуце на прешлорочну роботу КПД „Дюра Киш” у Шидзе и виберанкову Скупштину КПД „Карпати”. Ту мож пречитац и приказ нового Руского християнского календара 2018 и кнїжки Владимира Ґарянския „Конь зоз чудесней ноци” котри видала наша Установа.
Свойо искуства у продукциї рижних польопривредних културох дала нам фамелия Шантових з Коцура, а на „Економиї” и информация о початку жимских преподаваньох у орґанизациї Здруженя паприґарох „Капсикум анум” и предлуженя судскей розправи у случаю поверительох „АБЦ ФУД”.
Рубрика „Людзе, роки, живот” у фельтону „Як (нє) скапал рокенрол” понука розгварку зоз Славком Романом Рондом, а уж започати и нови фельтон – з нагоди 50. Драмского мемориялу Петра Ризнича Дядї хтори пише Дюра Латяк. У тим чишлє представена и малярка Олґа Чизмар зоз Шиду.
На „Спорту” пише о традицийним картаню през швета у Коцуре, дзе и розгварка зоз Здравко Бабичом, дакедишнїм „Искровим” фодбалером.