РУСКИ КЕРЕСТУР – Вчера отримана конститутивна схадзка Управного одбору (УО) Дому култури Руски Керестур, чиїх членох, як снователь, меновала Скупштини општини (СО) Кула на штиророчни мандат.
За предсидателя УО СО меновала Янка Николича, котри и у прешлим мандату окончовал тоту функцию, а за членох спред локалней самоуправи меновани Владимир Олеяр, Янко Варґа и Янко Мудри. Понеже Национални совит (НС) Руснацох керестурски Дом култури преглашел за установу од окремного значеня за Руснацох, СО Кула на предлог НС до УО меновала Михайла Зазуляка, а спред занятих у Доме култури Юлияна Рамача и Михайла Бодянца. Шицки члени УО з Руского Керестура.
На вчерайшей схадзки за заменїка предсидателя УО вибрани Янко Мудри, прилапени з ребалансом општинского буджету ускладзени финансийни план и план явних набавкох Дому култури, як и Одлука о розписованю конкурсу за директора Дому култури.
Терашньому директорови тей установи Йоакимови Рацови 16. януара 2016. року виходзи штиророчни мандат, та у складзе зоз законскима предписанями, принєшена Одлука о розписованю Явного конкурсу за вибор и менованє директора Дому култури. Конкурс будзе обявени у шлїдуюцим чишлє новинох „Руске слово”, на пияток, 20. новембра.