РУСКИ КЕРЕСТУР – Як самим концом прешлого рока на Шветочней схадзки Совиту Месней заєднїци Руски Керестур винєсол керестурски парох о. Михайло Малацко, у 2014. року було 38 кресценя, 17 пари повинчани, а до конца рока поховани 74 особи.
У одношеню на 2013. рок, у прешлим року умарли 29 особи менєй, алє число покресцених и повинчаних исте як 2013. року.
У Месней канцелариї, односно у матичара у Руским Керестуре, дзе ше до кнїжкох записує лєм особи котри умарли у валалє, до кнїжки умартих уписани 50-еро, а до кнїжки повинчаних 20 пари. Народзених ше уписує до матрикулох у месце народзеня.
Як на спомнутей схадзки гварел парох Малацко, и прешлого року ше робело на обнови и ушореню керестурского церковного будинку, як найстаршого руского и од окремного значеня за нашу заєднїцу на тих просторох, а роботи буду предлужени и у тим року.