Початком фебруара закончени нови циклус єдней з найатрактивнєйших програмох Покраїнскей влади – Конкурс за додзельованє безповратних средствох младим малженским паром за купованє хижох на валалє.
Понеже перши таки Конкурс указал вельке интересованє младих парох з Войводини за таку файту потримовки, у тим, другим по шоре обезпечени буджет бул векши як влонї. У маю 2015. року, односно у першим Конкурсу, були наменєни 40 милиони динари, свой дом на валалє здобула 41 фамелия, а образовни установи у Войводини, односно оводи и валалски школи постали богатши за коло 100 нови дзеци.
Успих предходного Конкурса на хтори апликовали вецей як 270 войводянски фамелиї надрилєл обовязку же би ше исти повторело, и же би постал порядна активносц Покраїнскей влади.
Попри тим, вельке интересованє явносци и медийох тиж допринєсли афирмованю основних цильох Kонкурса, та за тоту намену у другей половки 2015. року обезпечени додатни средства, односно вкупно 68 милиони динари.
Спомедзи 350 младих малженских и нєповинчаних парох кельо конкуровали 2015. року, 74 достали средства за купованє хижох на валалє, а 4. фебруара им уручени и контракти.
Циль конкурса же би млади пари достали свой власни дом, та подмладзованє валалох и приход младих фаховцох до валалских штредкох. З нагоди уручованя контрактох, Покраїнски сектретар за привреду, обезпечованє роботи и ровноправносц полох Мирослав Васин визначел же и у тим кругу було вельке интересованє за програму, а тераз свой дом на валалє достаню и 150-еро дзеци.
– Прешлираз було коло 80-еро дзеци. Значи, ми подмладзуєме валали. Резултати того конкурса указую же го треба предлужиц и то з ище векшим интензитетом. Наздавам ше же и идуца Покраїнска влада препозна значносц того проєкта и предлужи го запровадзовац – гварел Васин.
После подписованя конктрактох, хтори добитнїком средствох придал предсидатель Покраїнскей влади Боян Пайтич, уплацени пенєжи тим котри их предаваю, а млади пари поставаю условни власнїки обисцох, з тим же вони дзешец роки буду под гипотеку. Кед и о дзешец роки хаснователє буду жиц на валалє, Покраїнска влада знєє гипотеку и теди вони постаню єдини власнїки маєтку.
– Без розвитого и богатого валалу у хторим млади людзе буду роснуц, робиц и зарабяц, нєт будучносци, нє лєм у Войводини, алє и у цалей жеми – визначел з тей нагоди предсидатель Покраїнскей влади Боян Пайтич.
ПРЕЦИЗНИ УСЛОВИЯ КОНКУРСА
Конкурс ше запровадзує прейґ Заводу за ровноправносц полох, а ма два наменки – преход парох зоз городох на валал, або их оставанє на валалє. Учашнїки Конкурса могли апликовац лєм зоз єдну прияву, а сума додзелєних средствох нє може буц векша як милион динари.
Цилї конкурса унапрямени на порушованє розвою руралних штредкох, оживйованє и подмладзованє войводянских валалох през приход дзецох и звекшанє наталитету, иницированє процесу злєпшованя демоґрафскей структури у руралних штредкох, алє и звекшанє числа женох власнїцох нєрухомосци.
Право участвовац мали малженски пари чия заєднїца тирва найменєй рок и нєвинчани пари з тирвацшу заєднїцу, а дефиновани и условия же би учашнїки Конкурсу мушели буц народзени после 1. януара 1975. року, далєй найменєй пейц роки мали нєпреривне пребувалїще на териториї АПВ, од скорей нє маю рухомосц у власносци на свойо мено, нє у родзе су по креви зоз предавачом нєрухомосци, єден зоз супружнїкох муши буц заняти, а тарґовищна цена предметней нєрухомосци, односно обисца на валалє, може максимално виношиц 1,5 милион динари.
Попри прияви, учашнїки мали обовязку придац обовязну документацию, та медзи иншим пополнєту прияву на Конкурс, фотокопиї особней карточки, дипломи о здобутим образованю, потвердзенє о пребувалїщу, державянству, доказ о малженскей заєднїци, вивод зоз Служби за катастер о нєрухомосци хтору учашнїки предкладаю за купованє, даєдни документи з ПИО фонду, з Порцийней управи и друге.
Приявйованє на Конкурс тирвало од юлия по 10. септембер 2015. року, а резултати на сайту АП Войводини обявени у штредком януара того року.
И КЕРЕСТУР ИНТЕРЕСАНТНИ
На Конкурсу участвовали и Владимир и Бояна Чирич зоз Вербасу, хтори одлучели жиц у Руским Керестуре.
– Конкурс зме видзели у новинох, а понеже моя шестра одата у Керестуре, кед зме ишли до нєй – попачело нам ше место, та зме одлучели там глєдац хижу. Тиж, одвитує ми и пре роботу, понеже робим у Кули – гвари Владимир, хтори роби як ґеометер у єдней приватней фирми у Кули. Кажде мушел конкуровац з одредзену хижу, а Чиричово обишли коло 20 хижи.
– Хижа муши буц у добрим стану, функционална, односно нє може буц руїна анї барз драга хижа – бо таки нє преходза на конкурсу. Окрем того, хижа муши мац и жем коло обисца, заграду, нус просториї, а єй вредносц нє шме прейсц 1,5 милион динари – приповедаю Чиричово хтори после подписованя контракту о преношеню пенєжу з Покраїни на нїх окончели и другу потребну процедуру. З контрактом пошли до нотара подписац купопредайни контракт, потим го придали до Катастру одкаль сцигло потвердзенє же предмет придати, а вец пенєж преруцени им, и на концу предавачу. Так же хижа тераз уж и укнїжена на їх мено.
– Цо ше дотика власносци, мушело писац „терхи нєт”, односно ситуация коло власносци мушела буц чиста. А боди зме зберали на стаж, на фахову приготовку, число членох ґаздовства, дзецох и друге. Циль акциї праве же би ше високо образованє жительство з дзецми преселєло на валал – толкує Владимир хтори ма закончену висшу ґеодетску школу.
Спрам условийох конкурса, маю часу три мешаци же би ше уселєли и преруцели особни карточки на тоту, нову адресу.
– Пачи нам ше же мирне место, велї людзе робя у польопривреди, валал активни, ма школу, Ґимназию, оводу. Людзе добри и вредни. А нам добре рушело, достали зме дзивче Надю, Владимир пременєл роботу, бо зме пред тим були у Ириґу дзе зме були подквартельоше. Тераз зме и хижу достали, так же нам ше шицко крашнє зложело. Лєдво чекаме уселїц ше, а и то будзе швидко – задовольна Бояна.
ДАЄДНИ ШЕ МУШЕЛИ ОДДУМАЦ
Никола и Мирела Перенчевичово зоз Коцура тиж конкуровали за купованє хижи на валалє, и пенєж им одобрени. Медзитим, як толкую, условия ше у медзичаше пременєли и вони од тих пенєжох на концу одустали.
– Кед зме першираз конкуровали, жили зме у иншаких условийох. И я и моя супруга мали роботу у Вербаше, и шицко нас вязало за Коцур. Тот конкурс нам ше видзел як красне ришенє за купованє власней хижи. Першираз зме нє прешли на конкурсу, алє други раз нам ше поспишело, медзитим моя супруга вецей нє роби, а я робим у Суботици, та нам ше условия пременєли. Познєйше зме уж почали роздумовац и о преселєню до Суботици, а у контрактох хтори зме мали подписац за одобрени пенєж стої же ми у тей хижи на валалє мушиме пребувац шлїдуюци дзешец роки. У процивним, хижу нам держава ма право вжац, цо нє було наглашене у Конкурсу. То була и причина же зме одустали. Ми наисце нє знаме же дзе закончиме нарок, а нє о дзешец роки, праве пре роботу, и нє могли зме ґарантовац же будземе жиц у Коцуре – прешвечено толкує Никола.
Никола и Мирела гваря же вони обачую нєлоґичносци у Конкурсу. Як толкую, єдно з условийох хторе ношело одредзене число бодох була цо висша квалификация роботи. Перенчевичово думаю же то дакус контрадикторне, з оглядом же висококвалификовани особи скорей можу найсц роботу у городзе, за розлику од особох з нїзшу квалификацию хтори ше поведзме занїмаю зоз польопривреду, та им баржей одвитує жиц у валалє. Никола и Мирела прешвечени же праве таким людзом требало дац векшу шансу, и помогнуц им на тот способ.
На концу, число фамелийох хторе на двох дотерашнїх конкурсох апликовало за хижу на валалє гутори же ше млади заш лєм жадаю врациц з городу на валал и остац жиц на валалє. А най би з рока на рок росла и сума обезпеченого пенєжу за тоту афирмативну длугорочну акцию хтора кельо-тельо допринєше ревитализациї войводянских валалох.