ШИД – Совит за безпечносц општини Шид вчера, 2. септембра, отримал позарядову схадзку пре актуални проблеми у безпечносци пре миґрантску кризу, насампредз пре звекшане число каребних дїлох єдного числа миґрантох, як и знємированє гражданох шидскей општини.
Схадзка була заварта за явносц, алє после схадзки Предраґ Вукович, предсидатель Општини, виявел же ше од державних власцох, насампредз Министерства нукашнїх дїлох, вимага же би ше у шлїдуюцих 48 годзинох безпечносц врацело на прилаплїви уровень. Кед ше то нє сполнї, локална самоуправа будзе вимагац же би ше дислоцировало Прилапююци центер за миґрантох у Шидзе просто гайзибанскей станїци.
Предсидатель Вукович додал же формована Општинска комисия хторей гражданє можу приявиц евентуалну материялну чкоду.
У роботи Совиту участвовали и Иван Ґерґинов, заменїк комесара за вибеженцох и миґрациї Републики Сербиї, представнїки Полицийней станїци Шид, правосудства, Червного крижу, Дома здравя и други.
Вчера на подручу општини реґистровани коло 1 500 миґранти а, як гварене, єдно число миґрантох анї нє евидентоване.