БЕОҐРАД – За церкви и вирски заєднїци у Сербиї з державного буджету у тим року опредзелєни коло милиярду 23 милиони динари, цо вецей як прешлого року, док нарок тот винос будзе за 30 одсто менши – гварел вчера за Танюґ директор Управи за сотруднїцтво з церквами и вирскима заєднїцами Милета Радоєвич.
Тогорочни буджет звекшани пре вирйованє длуства за пензийне и здравствене осиґуранє священству и вирским службенїком ище од 2012. року и плановане же церкви тоти длуства вимиря того року. Держава предлужи видвойовац пенєж за пензийно-инвалидске и здравствене осиґуранє священїком и вирским службенїком, гварел Радоєвич.
Поєдинєчно, вирски заєднїци у Сербиї средства з буджету доставаю зрозмирно числу своїх вирнїкох, а на основи попису жительства. Так, понеже Сербска православна церква ма 84,7 одсто припаднїкох, вона достава и найвецей средства. Друга по велькосци Католїцка церква, хтора ма коло 5 одсто вирних з числа гражданох, а Исламскей заєднїци припадаю дацо вецей як 3 одсто, гоч, як гварел Радоєвич, за нїх тоти податки дискутабилни, понеже ше велї гражданє на югу Сербиї на остатнїм попису нє вияшньовали о вирскей припадносци.
– Справуєме ше спрам урядових податкох и вимогох вирских заєднїцох, так же з того боку нє маме пригварки на принципи розподзельованя – визначел Радоєвич, и додал же ше, на основи проєктох прейґ конкурсох, финансує шицки потреби вирских заєднїцох – од инфраструктурних по образовни, та активносци вязани за очуванє вирского, културного и националного идентитету.