СРИМСКА МИТРОВИЦА – Тих дньох видрукована кнїжка „З историї грекокатолїцкей церкви у Сримскей Митровици”, котру преглядно написал и з документацийнима материялами подкрипел, протоєрей ставрофор о. Владислав Варґа.
Кнїжка вишла з нагоди 130-рочнїци снованя грекокатолїцкей парохиї и 110-рочнїци вибудови церкви Вознесения Господнього у Сримскей Митровици. Попри красних и богатих илустрацийох, кнїжка и информативна, бо мож пречитац хтори парохове служели у Митровици – од Максимилияна Релича по нєшкайшого о. Владислава Варґового.
З огляднуцом на кратку историю Сримскей Митровици, начишлєни и церковни кнїжки, молитвенїки и икони котри ше находза у тей парохиї, лєбо у приватним власнїцтве, презвиска Руснацох грекокатолїкох у Митровици и околїску, и Руснаци и Українци котри допринєсли културному добру того места.
Промоция кнїжки у Сримскей Митровици будзе у рамикох означованя Националного швета Руснацох на штварток, 17. януара, у Музею Сриму.