БРИСЕЛ – У рамикох манифастациї Европски тидзень городох и реґийох „Отворени днї 2015”, вовторок, 13. октобра, у Европским парламенту отримани Округли стол з назву „Розумиц Войводину” („Understanding Vojvodina”), на хторим през представянє роботи шейсцох професийних установох култури – Сербох, Мадярох, Румунох, Словацох, Горватох и Руснацох – приказана мултикултуралносц Войводини, очуванє, унапредзованє, та попреплєтаносц културного скарбу и творчосци вецей як 20 нацийох хтори жию на тим просторе.
Домашнї Округлого столу бул член Европского парламенту Франц Боґовиц, а до дебати ше уключели и посланїки Иван Яковчич и Андор Дели, та други госци. Спред Автономней покраїни Войводини присутних привитал предсидатель Покраїнскей влади Боян Пайтич, а бешедовал и покраїнски секретар за културу и явне информованє Славиша Ґруїч.
– Секретарият рочнє софинансує вецей як 350 проєкти з обласци култури и уметнїцкей творчосци 19 националних заєднїцох у Войводини. Зоз средствох за програми/проєкти културней творчосци, 33 одсто опредзелєни за културу националних заєднїцох. У обласци информованя Секретарият дава 67 одсто буджету за медиї на язикох националних меншинох. Финансуєме медиї на осем язикох, вєдно 22 виданя – гварел Славиша Ґруїч.
Завод за културу войводянских Руснацох представел його директор Серґей Тамаш, а о активносцох и роботи других заводох на сходзе бешедовали їх директоре – Заводу за културу войводянских Горватох Томислав Жиґманов, Мадярох Мартина Ґонди, Румунох Тодор Урсу, Словацох Милина Склабински, а спред Заводу за културу Войводини бешедовал проєктни менаджер и сотруднїк за медзиреґионалне сотруднїцтво Драґан Илич.
Округли стол „Розумиц Войводину” орґанизовал Покраїнски секретарият за културу и явне информованє и Завод за културу войводянских Словацох, у сотруднїцтве з Фондом „Европски роботи” АП Войводини.
