БЕОҐРАД – Коментариюци Нарис Закона о финансийней потримовки фамелиї з дзецми, министер за роботу, обезпечованє роботи, борецки и социялни питаня Александар Вулин вчера гварел же даваня положнїцом нє буду зменшани, алє звекшани и же Закон допринєше лєпшому квалитету живота положнїцох.
– Дотераз надополнєня положнїцом раховани на основи основного заробку, а тераз буду раховани зоз шицкого цо заробице – и з реґресу и надополнєня за цепле костиранє, та уж на початку звекшана основа за надополнєнє положнїцом – гварел Вулин.
Додал же нїґдзе на швеце нє мож найсц приклад же нєзанята положнїца достава надополнєнє з буджету. Наглашел же запровадзени и два нови катеґориї положнїцох – жени котри на дочасових роботох и жени власнїци польопривредних ґаздовствох, котри децениями нє могли достац анї динар положнїцкого надополнєня.
Министер Вулин гварел и же положнїци од 1. юлия надоплнєня буду доставац директно на свой рахунок, а нє прейґ роботодавательох.