СЛОВАЦКА – Вовторок, 27. януара, наполнєли ше двацец роки як службено преглашени акт о кодификованю русинского язика у Словацкей, на шветочносци на Универзитету Коменского у Братислави 1995. року.
Попри представительох Русинох, на шветочносци з нагоди преглашеня кодификованя русинского язика у Словацкей теди присуствовали и представителє власци Словацкей, представителє министерствох култури и школства, представителє Матки словацкей, наукових институцийох, грекокатолїцкей и православней церкви, госци з иножемства, насампредз язикознавци и слависти.
Кодификованє русинского язика оможлївене после обнови русинского руху у Словацкей предводзеного з Русинску оброду и на нїм ше нєшка видава кнїжки, новини и часописи, русински язик ше виучує у школох и на факултету, присутни є у електронских медийох у Словацкей.
З нагоди преглашеня, пред 20 роками Координацийни одбор Русинскей оброди видал и окремну Декларацию зоз шветочного преглашеня кодификованя русинского язика у Словацкей.