ДЕВА (РУМУНИЯ) – На Тринастим Шветовим конґресу Русинох/Руснацох/Лемкох (ШК РРЛ) и Седмим Шветовим форуме русинскей младежи, хтори у Румуниї, у Деви, отримани од 18. по 21. юний, участвовали и Руснаци з Горватскей.
Спред Дружтва Руснацох у Горватскей „Руснак” з Петровцох, як члена Конґресу, на зашеданю у Румуниї як делеґати були Мийо Шайтош, Ясна Шайтош, Наталия Гнатко, Любомир Гнатко, Еуґения Врабец, Иван Врабец, Петро Киш, Ружица Киш, Крешимир Мишир и Томислав Мишир. Мийо Шайтош вибрани и за єдного з двох подпредсидательох Шветовей ради РРЛ.
Делеґати на Седмим Форуме русинскей младежи були Мартина Матанович, Мартина Николич, Мирон Гнатко и Ивона Гнатко, котра вибрана и за подпредсидательку Форуму. Млади з Дружтва „Руснак” участвовали и на пригодней културно-уметнїцкей програми под час Конґресу.
Як госци дотерашнього предсидателя Шветовей ради РРЛ Дюру Папуґу на Тринастим Шветовим конґресу були и заступнїк националних меншинох (медзи нїма и рускей) у Соборе Републики Горватскей Велько Кайтази и началнїк Општини Стари Янковци Драґан Сударевич, котри привитали одлуку же шлїдуюци Конґрес будзе отримани у Горватскей, у Старих Янковцох, и обецали потримовку у його пририхтованю.