КУЛА – Кулску општину вчера, 15. септембра, нащивел державни секретар у Министерстве за роботу, обезпечованє роботи, борецки и социялни питаня у Влади Сербиї Ненад Иванишевич и после розгварки з чолнима людзми Општини – предсидательом Општини Перицом Видеканїчом, його заменїком Карольом Валком и предсидательом Скупштини општини Велибором Милоїчичом, нащивел и Центер за социялну роботу кулскей општини, дзе госцом домашня була директорка Центру Ґордана Вакула.
Интересантне же то за кратки час уж друга службена нащива високих функционерох з того министерства, бо у априлу ту бул и сам министер Вулин, так же и з тей нагоди визначене барз добре сотруднїцтво кулскей општини и Министерства за роботу, обезпечованє роботи, борецки и социялни питаня.
Як гварел державни секретар Иванишевич, кулска єдна з активних општинох у Сербиї, та за остатнї два роки мала и значну увагу Министерства, понеже до нєй уложело прейґ 20 милиони динари – коло 3 милиони до Центру за социялну роботу, коло 11 милиони до Дому за старих, прейґ наменских трансферох за розвой услугох у заєднїци прейґ 4,5 милиони, а Центру подаровало и єдну превозку.
Єдна з темох вчерайших розгваркох була и способ трошеня средствох за спомнути услуги, та плани роботи за идуци рок, можлївосци апликованя зоз заєднїцкима проєктами општини и Министерства до ЕУ, алє и помоц у преширеню простору Центру и вимесцанє його активного Совитовалїща за малженство и фамелию до окремного простору, же би могло робиц цали дзень и з окреме анґажовану особу.
Як гварела директорка Центру Ґордана Вакула, то єдна з найстарших таких установох у Сербиї, понеже того року наполнєла 55 роки роботи, а у зависносци од часци рока, ма од 600 до 1 400 хасновательох, односно фамелиї котри доставаю финансийну материялну помоц. Медзитим, то лєм менша часц у їх роботи, бо найвекша то поєдинєчна робота фаховцох Центру з рижнима загроженима катеґориями у дружтве, як цо то зоз старима, малженскима парами, хорима, з особами котри церпя насилство, вообще – з людзми у нєволї.
Кед слово о Руским Керестуре, директорка визначела барз добре сотруднїцтво Центру з парохийним Каритасом и Месну заєднїцу, а як гварела – хасновательох рижних формох помоци у Керестуре єст исто як и у других местох општини, анї менєй, анї вецей.