ЗАҐРЕБ – На заґребским Зринєвцу внєдзелю, 12. юния, отримани Дзень националних меншинох Городу Заґреб, на хторей участвовали представителє 18 з 22-ох националних меншинох, кельо жию у Заґребу.
Манифестацию орґанизовала Координация радох и представительох националних меншинох Городу Заґреб, у хторей и Представитель рускей националней меншини Заґребу Ириней Мудри.
Манифестацию отворел городоначалнїк Милан Бандич, а бешедовал и предсидатель Совиту за национални меншини Републики Горватскей Александар Толнауер, та предсидатель Координациї Душан Мишкович, котри наглашел же национални меншини творя 5,26 одсто цалосного жительства Заґребу.
На Дню националних меншинох Заґребу Руснаци представени на окремним штанду з нашима єдлами и видавательством, а у културней програми наступели члени КУД „Яким Гарди” з Петровцох. На манифестациї присуствовала и предсидателька Союзу Русинох РГ Дубравка Рашлянин.
Попри велїх визначних особох, манифестацию нащивели и академик Звонко Кусич, министер за вонкашнї и европски дїла РГ Миро Ковач, як и предсидатель Скупштини Городу Заґреб Андрия Микулич.