СЕРБИЯ – Кажди рок ше вше вецей гражданох жалї на дискриминацию, а людзе найчастейше дискриминовани на основи националней припадносци, здравственого стану, старосци, инвалидитету, вири и полу, гварела Поверенїца за защиту ровноправносци Невена Петрушич и наведла же до тей институциї прешлого року поднєшени 885 прияви.
Понеже то ствар еґзистенциї, гражданє найчастейше приявйовали дискриминацию у поступку обезпечованя роботи, и то найвецей у орґанох явней власци. У представяню звиту за прешли рок, Петрушичова дала и препоруки же би ше убудуце водзело родно балансовану кадровску политику и же би у орґанох власци було и одвитуюце число припаднїкох националних меншинох-заєднїцох.
Вона наведла и податок же пиятина гражданох Сербиї нє зна же дискриминация по законє забранєна, трецина нє зна же забранєна и бешеда мержнї, а 50 одсто випитаних гражданох дума же дискриминовани гражданє сами виновати за свойо положенє.