НОВИ САД – Вчерайши дзень, 23. октобер, означує ше як Дзень ошлєбодзеня Нового Саду у Другей шветовей войни, як здогадованє на подїї котри ше случели 1944. року, кед борци Новосадского партизанского одряду ошлєбодзели город, а з нього ше поцагли остатнї фашистични окупацийни єдинки.
З нагоди 75 рокох ошлєбодзеня Нового Саду од фашизма представнїки городскей власци и Союзу здруженя борцох Народноошлєбодительнєй войни, Войска Сербиї и Орґанизациї Резервних воєних старшинох Городу Нового Саду положели венци на Спомин теметове борцох Народноошлєбодительней войни, а потим и на памятнїк Новосадскому партизанскому одряду на Ченею.
На шветочней академиї уручени Октоберски награди и Новемберски повелї котри того року достали професор доктор Илия Ковачевич и уметнїк и музичар Милан Мумин, односно резервни полковнїк Бошко Пилипович и ветеринар, радиолоґ и науковец дохтор Милош Петрович, преношо сайт Рускей редакциї Радио-телевизиї Войводини.