БЕОҐРАД – За нового предсидателя Демократскей странки (ДС) члени тей странки на нєпоштредних виберанкох всоботу, 24. септембра вибрали Драґана Шутановца, а як преноши Бета, за ньго гласали 59 одсто членох ДС. За предсидателя ДС ше кандидовали и Боян Пайтич (достал 16,09 одсто гласи), Срболюб Антич (5,12 одсто) и Зоран Лутовац (19,8 одсто).
Нєшка би мали буц познати и хто вибрани за подпредсидательох ДС, а канидовани Ґордана Чомич, Наташа Вучкович, Тамара Трипич, Милош Джаїч, Нада Колунджия, Надя Хиґл, Драґослав Шумарац, Иґор Салак, Драґан Домазет, Йован Маркович, Боґдан Татич и Бранислав Лечич.
По обявйованю резултатох виберанкох у странки, дотаршнї предсидатель ДС Боян Пайтич вчера задзековал на длужносц шефа Посланїцкей ґрупи ДС у Народней скупштини.
Драґан Шутановац член ДС од 1997. року. Од новембра 2001. по фебруар 2003. року бул помоцнїк союзного министра нукашнїх дїлох, а од 2007. по 2012. рок министер одбрани у Влади Сербиї.
Нови предсидатель ДС Драґан Шутановац гварел же на тих виберанкох окончени найвекши кадрово пременки у тей странки од єй снованя, як и же то початок новей епохи, у хторей ДС понукнє ришеня за проблеми гражданох.