ҐОСПОДЇНЦИ – У Основней школи „Жарко Зренянин” у Ґосподїнцох вчера отримане литературне стретнуце на хторим представени наш часопис „Заградка” и двоязична кнїжка за дзеци „Да ли ми верујете – Чи ми верице” хтору пририхтала писателька Мелания Римар, а видали Змайово дзецински бависка у Новим Садзе.
Госцох у школи привитала директорка Таня Тот, а понеже у Ґосподїнцох орґанизована и настава виучованя руского язика як виборного предмету, на литературним стретнуцу були и школяре зоз наставнїцу Ана Марию Рац хтора им трима годзини мацеринского язика. Як поволанку на сотруднїцтво зоз „Заградку” шицки достали по єден прикладнїк того часописа.
Зоз Змайових дзецинских бавискох на промоциї була Весна Паунович хтора поволала ґосподїнских школярох же би участвовали на тим веселим юнийским швету.