РУСКИ КЕРЕСТУР − Тогорочни Драмски мемориял Петра Ризнича Дядї закончени вчера вечар зоз виводзеньом госцуюцей представи Аматерского театру културного центру зоз Кули „Паночка Юлия” по тексту Авґуста Стринберґа, а у режиї Фуада Табучича.
Дїло у котрим ше нєпреривно преплєта приповедка котру розпинаю богатство и худобство, любов и мержня, добре и зле виведол трочлени ансамбл − Милана Нинич у улоги паночки Юлиї, Едита Лико наступела як служнїца Кристина, а Слободан Ноґавица як Жан, котри достал и награду публики.
Сценоґрафию зоз одличнима ефектами циню и шветла зробел Перица Самац, а костимоґраф була Зорица Йованович.
Вецей фотоґрафиї мож поопатрац у нашей фотоґалериї.