БРАТИСЛАВА – За Особу 2014. рока Здруженє интелиґенциї Русинох Словацкей преглашело русинского карикатуристу и сатиричара Федора Вицу, познатого нє лєм у Словацкей, алє и поза гранїци. Награда Вицови придата 17. янура на уж традицийним Балє Русинох у Братислави, а уручел му ю предсидатель спомнутого Здруженя Михал Штеньо.
Награду Особа рока Здруженє интелиґенциї Русинох Словацкей додзелює за животне дїло и тирваце доприношенє розвою русинскей култури, а додзелєна є швартираз. Дотерашнї добитнїки Награди режисер Марко Шкоп, шпивачка Мария Мачошкова и Михал Штеньо, а состої ше зоз скулптури воланей Медова жена, хтора символизує вредносц русинского народу. Ориґинална скулптура ше находзи над валалом Нова Седлица.
Примаюци Награду за Особу рока, Федор Вицо подзековал на свой гумористични способ – же му є окреме мила, бо од Русинох дотераз ищє нїґда нє достал даяку награду.
На 12. Балє Русинох у Братислави були коло 180 госци з рижних крайох Словацкей, привитовани су з „русинску боровичку”, забявяли их два оркестри – „Любока” зоз Старей Любовнї и „Юниор” з Камєнки, а у културней часци програми наступел Фолклорни ансамбл „Рутениа” з Братислави.
Медзи госцами була и ополномоцнїк Канцелариї за национални меншини Влади Словацкей Републики Мария Єдличкова, директорка спомнутей Канцелариї Алена Котванова и державни секретар Марян Салоня.