РУСКИ КЕРЕСТУР – Медзинародни Дзень женох – 8. марец, у Руским Керестуре означени з вецей рижнима програмами у дзецинскей заградки, Школи „Петро Кузмяк”, Здруженю женох „Байка” и Клубу за старих и пензионерох, а три днї у центре валала на вецей штандох могло купиц рижнородне квеце, прикраски и дарунки женом. Квеце всоботу дополадня предаване и на пияцу, а у дньох пред и на саме швето, и у векшини валалских предавальньох.
Попри тим же од пиятку по вчера замерковани штанд з виробками своїх членїцох у центре валалу мало Здуженє женох „Байка”, Здруженє и з окремну програму, вєдно з Клубом за старих и пензионерох, пияток, 6. марца, у Доме борцох и пензионерох орґанизовало и окремну програму з нагоди 8. Марца. За тоту нагоду жени пририхтали виставу тканих роботох, а госц з Коцура Силво Горняк виведол монодраму „Я бувши” Серафини Медєши, у режиї Дюру Макая, у продукциї Етно-клубу „Одняте од забуца”.
Дзень женох керестурским Оддзелєню „Цицибан” кулскей ПУ „Бамби” означовани цали тидзень у шицких воспитних ґрупох з пригоднима програми дзецох своїм мамом, док у Школи „Петро Кузмяк” швето означене з рижнима креативнима роботнями, на хторих школяре вирабяли дарунки мацером, алє и з виставу диґиталних принтох „Красота задуманей жени”, младей уметнїци Кристини Ґшвенґ з Вербасу. Виставу од прешлого тижня мож опатриц у голу Школи