НОВИ САД – Нєшка почина кампаня „16 днї активизму процив насилства над женми”, так же Женска парламентарна мрежа у Скупштини Войводини вчера порушала петицию же би 18. май бул преглашени за Дзень здогадованя на забити жени жертви насилства. Подписованє петициї орґанизоване источашнє кед отримована схадзка Скупштини АП Войводини, та ю подписали и покраїнски посланїки.
Насилство над женми вельки и єден з ключних проблемох у дружтве, гварела координаторка Женскей парламентарней мрежи у Скупштини АПВ Стоянка Лекич. Тиж здогадла же за перши два мешаци 2015. року збити аж 29 жени, а у истим периодзе того року забити 18 жени. Тота мрежа предложела же би дзень здогадованя бул 18. май, прето же 2015. року за три днї забити седем жени, а 18. май бул остатнї з тих трох дньох.
Кампаня „16 днї активизму процив насилства над женми” тирва од нєшка по 10. децембер, а за тот час Женска парламентарна мрежа и зродни орґанизациї з рижнима активносцами буду обрацац увагу на проблем насилства над женми.