СЕРБИЯ – Заняти у Републичним ґеодетским заводзе (РҐЗ) и його оддзелєньох у шицких местох у Сербиї вовторок, 15. децембра почали штрайк, з почитованьом минимуму процесу роботи. Заняти вимагаю же би нє були облапени з Одлуку о максималним чишлє занятих у явним секторе, односно же би у нїх нє було одпущованя з роботи.
Штрайк орґанизую три репрезентативни синдикати Заводу, котри гваря же з применьованьом Одлуки буду утаргнути вецей як 50 служби за катастер, одпущени 123 роботнїки, буду розтаргнути контракти зоз 700 особами и утаргнути 450 нєпополнєти роботни места.
Прегварки з компетентнима уж почали, а министерка будовательства, транпорту и инфраструктури Зорана Михайлович гварела же нєт причини за штрайк и же проблеми у РҐЗ мож ришиц з догварку, а нє зоз штрайком.
– Кед нє функционує катастер, вец анї други ствари нє можу функционовац на одвитуюци способ – гварела Министерка Михайлович.
Наглашела же дотераз за Завод поробене вельо, же обезпечени 40 милиони еври кредиту же би заняти достали нови званя, алє и же потребне реформованє Заводу.
– Министерству будовательстгва прешлїдзени 30 000 нєришени предмети РҐЗ, цо гутори же цошка треба меняц у роботи тей служби – гварела Зорана Михайлович.