КОЦУР – У коцурскей Основней школи „Братство єдинство” вчера отримана промоция Основней и штреднєй школи з домом школярох „Петро Кузмяк” з Руского Керестура.
Педаґоґ Иван Медєши на промоциї коцурским школяром през видео-презентацию представел Школу и интернат, зоз шицкима технїчнима можлївосцами хтори им вона понука. Бешедовал о своїм искустве, понеже и сам ходзел до тей школи, а представянє дополнєл и Иван Канюх з Нового Саду, котри штредньошколске образованє тиж здобул у Керестуре.
Предсидатель Вивершного одбору Националного совиту Руснацох Желько Ковач школяром винєсол пенєжни стимулациї хтори Национални совит понука школяром котри ше упишу до Оддзелєнє ґимназиї на руским язику, як цо то безплатне пребуванє у интернату и стипендиї од 5000 динари за найлєпших 10 школярох у руским Оддзелєню першей класи Ґимназиї.
На концу промоциї бешедовала и директорка керестурскей Школи Хелена Пашо Павлович, котра визанчела и нову дидактичну методу виводзеня настави на основи интерактивного ученя, хтору ше применює у Школи у Керестуре.
На презентациї присуствовали маломатуранти шицких трох оддзелєньох коцурскей ОШ, як и директорка Школи Славица Байор, та професорка биолоґиї Весна Раґаї Цап, котра и член Одбору за образованє Националного совиту Руснацох.