БЕОҐРАД – Нове зволанє Скупштини Сербиї комплетоване пондзелок, 6. юния, кеди за предсидательку вибрана єдина кандидатка Мая Ґойкович (СНС), котра тоту функцию окончовала и у прешлим зволаню, а меновани и шесцеро подпредсидателє и ґенерални секретар Скупштини.
З 250 посланїкох гласали 233, а ревибор Ґойковичовей потримали 159 посланїки зоз СНС, СПС, ЄС, ПЗПС, НС, СВМ-ПДД, Руху социялистох-Народней селянскей странки-Зєдинєней селянскей странки, док 73 були процив, а єден стримани.
По формованю 16 посланїцких клубох у Скупштини Сербиї порадзене же тото цело у тим зволаню будзе мац седем, место шейсц подпредсидательох и утвердзени кандидати, медзитим посланїки Руху „Досц було” на пондзелковей схадзки гласали процив, гоч посланїца того руху Ясмина Николич тиж була кандидатка.
За подпредсидательох Скупштини Сербиї у новим зволаню вибрани Веролюб Арсич (СНС), Владимир Маринкович (СДПС), Константин Арсенович (ПЗПС), Дьордє Миличевич (СПС), Вєрица Радета (СРС) и Ґордана Чомич (ДС), а за ґенералного секретара Скупштини менована правнїца Светислава Булаїч.
Шлїдуюци крочай то формованє Влади Сербиї и мандатар Александар Вучич (СНС) з представитлями парламентарних политичних странкох вчера почал консултациї о формованю новей Влади Сербиї. Як гварел, Влада будзе формована можебуц и после 16. юния, алє у законским терминє.