БЕОҐРАД – Скупштина Сербиї вчера почала розправу о Предлогу закона о буджету за 2016. рок, хтори облапя и звекшанє плацох и пензийох, видвойованя за одпремнїни и зменшанє ґаранцийох за явни подприємства. Плановани приходи виноша 997,4 милиярди, розходи 1 119 милиярди динари, та дефицит републичного буджету будзе 121,8 милиярди динари, односно 2,9 одсто бруто домашнього продукту, а дефицит держави будзе штири одсто БДП-а.
Обгрунтуюци Предлог, министер финансийох Душан Вуйович гварел же буджет обезпечи лєпши животни стандард гражданох, же є социялни и розвойни, бо обезпечени пенєж за шицки виплацованя гражданом и привреди, а звекшани розходи за капитални инвестициї, гварел Вуйович.
По Предлогу буджету за 2016. рок предвизени векши пензиї и плаци за занятих у просвити, здравстве, войску и полициї, алє у одношеню на 2015. рок, менєй пенєжу будзе за обласц польопривреди, култури и информованя и локални самоуправи, пише Бета.
На другим боку, министер Вуйович гварел же предложени буджет нє предвидує зменшанє субвенцийох за польопривреднїкох и наявел приношенє нового закона хтори реґулує тоту обласц.
Медзитим, вименки Закона о поривох у польопривреди наишли на неґативну реакцию Покраїнского секретарияту за польопривреду бо, як гварене, место дотерашнїх 6 000 динарох по гектаре, та 3 000 динарох за гориво и исто за штучни гной, вименки предвидзую субвенциї до 6 000 динари и вєдно 3 000 динари за гориво и вештак. Премия за млєко место дотерашнїх седем динарох будзе до седем динари.
Медиї преноша и же Министерство финансийох 2016. року општином планує зменшац власни приходи за 8 милиярди динари, а тот пенєж будзе преляти до державней каси.
За странки хтори маю представительох у Скупштини Сербиї з буджету за 2016. опредзелєни вєдно 871 милиони 080 000 динари, цо за 70 милиони динари вецей як того року, пише Бета.