НОВИ САД/РУСКИ КЕРЕСТУР – На Першенстве Сербиї за пионирох у гали, хторе внєдзелю, 8. фебруара отримане у гали Новосадского сайму, атлетичарки керестурского „Русину” освоєли два медалї у скаканю до висока.
Друге место и стриберну медалю освоєла Антония Монар з прескочену висину од 1,50м, а Валерия Ковач треце место и бронзову медалю, з прескочену висину од 1,40м. Першопласована атлетичарка з новосадскей „Войводини” тиж прескочела метер и пол, алє з першого разу, а Монарова з другого. Ковачова треце место подзелєла з єдну атлетичарку з беоґрадксей „Червеней гвизди”.
На змаганю участвовала и Тереза Будински у скаканю до далєка, котра внєдзелю доскочела на 3,88м, цо слабше од єй особного рекорду од 4,27м.
Ателтичарки „Русину” у скаканю до висока участвовали у моцней конкуренциї, медзи 13 младима змагательками з реномованих атлетских клубох, як цо то новосадска „Войводина”, беоґрадска „Червена гвизда”, та клубох з Нового Беоґраду, Канїжи, Земуну.
О два тижнї у Новим Садзе будзе и Першенство Сербиї у гали за младших пионирох, дзе АК „Русин” наступи з вецей младима атлетичарами.