НОВИ САД – Длуго наявйовани контракт медзи Желєзнїцами Сербиї, Автономней покраїни Войводини (АПВ) и Городу Нового Саду, о новим способе финансованя вибудови Жежельового моста будзе подписани на вовторок, 19. мая, наявел городоначалнїк Нового Саду Милош Вучевич.
Потим ше технїчно ушори преношенє средствох зоз АПВ на Город Нови Сад и обчекує ше же роботи на вибудови мосту буду такой предлужени. Роздумовало ше и о можлївосцох же ше ознова зявя нєпредвидзени трошки, алє вшелїяк плановане же мост будзе закончени за 20 мешаци, виявел Вучевич за аґенцию Танюґ.
Согласносц за подписованє анексу на основни контракт зоз 2011. року за вибудов того моста дала Влада Сербиї, зоз хторим предвидзене же Войводина обезпечи дополнююци 1.948.031,29 евра, а Город Нови Сад 974.051,65 евра.
Скупштина Городу Нови Сад нєдавно принєсла одлуки зоз хторима витворени законски условия же би ше средства за вибудов Жежельового моста зоз буджета АПВ пренєсли до городского и на тот способ ришене питанє виплацованя виводзачох роботох.