РУСКИ КЕРЕСТУР – На всоботу, 28. новембра отриманим Зборе гражданох, Совит Месней заєднїци Руски Керестур присутним Керестурцом представел дотерашню роботу и плани за 2016. рок, а у дискусиї члени Совиту од нїх чули и дзепоєдни проблеми з хторима ше жителє зочую.
На Зборе, хтори отримани у конференцийей сали у Спортскей гали присуствовали коло 50 жителє Керестура, векшина членох Совиту, на чолє з предсидательом Владимиром Олеяром и секретар Месней заєднїци Михайло Сабадош.
Олеяр начишлєл 14 ставки, зоз суму утрошеного пенєжу, односно цо поробене у 2015., та и 2014. року, кеди почал мандат терашньому Совиту. Медзи векши начишлєни роботи спада чисценє атмосферских яркох, початок асфалтованя драгох на Новим населєню, реновиранє фонтани у парку, поставянє камерох по валалє, реновиранє сали за винчанє, пущанє ґазу по валалє, а у 2014. року отворена Спортска хала и нєдавно ю почали хасновац клуби СД „Русин” и рекреативци.
Попри тим, по конєц рока плановани ище даскельо роботи, як цо то заменьованє закрица на Здравственей амбуланти, кладзенє ошвиценя у улїци Ґабра Ороса, та цалосне реновиранє парку у центре Керестура.
Бешедуюци о планох у 2016. року, предсидатель Совиту Владимир Олеяр наглашел же Совит шицки сили унапрями на инфраструктурни и комунални роботи, за хтори заплановани два и пол раз вецей средства. Медзи нїма вибудов драги до хотара, предлуженє асфалтованя драгох и чисценя яркох, подрезованє калдермох и поставянє пайпох, та ришованє проблему води хтора на улїцох стої после дижджох. Нарок плановане пооправяц и столїки на пияцу и положиц ошвиценє на фодбласки стадион на Ярашу.
Велї зоз спомнутих роботох як проблеми винєсли и жителє Керестура присутни на Зборе, а досц бешедоване о дзивей депониї у долїни при теметове, о камионох з цвиклу хтори иду по Ленїновей улїци, о можлївим гашеню Здруженя рибарох, о потреби же би знова робел локални радио и друге.
Вецей дискутанти наглашели потребу за канализацию, та пригварели Совиту же вона нє у планох за наступни рок. По словох предсидателя Олеяра, Совит пребера одредзени крочаї и у тим напряме, вєдно з МЗ Крущич, а пре барз драгу инвестицию, єй ришенє локална самоуправа унапрямела на приключованє на медзиопштински колектор (Кула-Вербас), цо годно буц о даскельо роки.
На концу двоиполгодзинового Збору, Саня Тиркайла и Соня Виславски представели нєдавно основани Каритасов Телефонски центер за слуханє „Нїтка”, хторому шедзиско у Керестуре.