ЖДИНЯ (ПОЛЬСКА) – У Ждинї, у Польскей, вчера, 22. юлия, почал 34. Фестивал лемковскей култури „Лемковска ватра”, а будзе закончени на ютре, 24. юлия. На Фестивалє наступаю вецей як 2 000 учашнїки з Польскей и иножемства, а медзи нїма и зоз Сербиї – члени КУД „Петро Кузмяк” з Нового Орахова, Хор „Пасторала” зоз Жаблю и Хор „Калина” з Индїї.
Попри зоз Сербиї, на „Лемковскей ватри” участвую и фолклорни колективи зоз Словацкей и України, а домашнї обчековали и приход ансамблох зоз ЗАД и Канади.
Под час Фестивалу у Ждинї цали час гори огень („лемковска ватра”), а попри музично-танєчней програми, отримує ше и науково и литературни трибини, та розгварки о дружтвених темох вязаних за Лемкох, без огляду дзе жию у швеце.
Орґанизатор Фестивалу „Здруженє Лемкох” з Ґорлицох, а покровитель тогорочного фестивалу войвода Малопольски Йозеф Пилч.
Госцованє аматерох зоз Сербиї обезпечел Союз Руснацох Українцох Сербиї, чия делеґация, на чолє з предсидательом Союзу Боґданом Виславским, тиж провадзи Фестивал у Ждинї.