НОВИ САД – На Новосадским сайме на ютре, 7. октобра почина штиродньови Медзинародни саям лову, риболову и спорту – ЛОРИСТ, а паралелно з нїм буду отримани и Медзинародни саям туризму и Саям конярства, на хторих ше вєдно представя вецей як 250 викладателє зоз шейсц державох.
На Сайме лову, риболову и спорту ше представя продукователє опреми и оружия за лови, а наявене же Саям будзе мац едукативну, забавно-атрактивну и викладацку часц. Дзень после, 8. октобра, почнє и Саям конярства, хтори будзе тирвац тиж по 10. октобер.
Саям туризму будзе тирвац од 8. по 10. октобер, а жем-партнер того року Чарна Гора. Нащивительом ше представя рижни туристични орґанизациї, продукователє єдзеня и напою, а 10. октобра будзе орґанизовани „Wellness & Spa Fest”, на хторим нащивителє годни достац безплатну масажу, коштовац єдзенє и достац рижни совити.
Новосадски саям будзе отворени од 10 до 19 годзин, а цена уходнїци 300 динари. Як узвичаєне, и за терашнї сайми будзе орґанизовани соботови „Фамелийни дзень”, кед за цену єдней уходнїци програми годна нащивиц цала фамелия.