НОВИ САД – З нагоди нєшкайшого Медзинародного дня старших особох Покраїнски омбудсман спозорює же ше, по податкох Зєдинєних нацийох, жительство Сербиї прешлу децению рахує медзи пейц найстарши на швеце, а проєкциї Републичного заводу за статистику за идуци 30 роки указую же старенє жительства у Сербиї будзе предлужене.
Найвецей жалби старих особох до Институциї Покраїнского омбудсмана одноша ше на витворйованє їх правох у обласци социялней и здравственей защити, пензийного и инвалидского осиґураня, як и пре способи на хтори (нє)витворюю дзепоєдни вигодносци при плаценю комуналийох, порцийох и других даваньох.
Омбудсман додава же ше, без огляду на чешке положенє у хторим нєшка жию, старши особи ридко обрацаю институцийом компетентним за защиту и унапредзенє людских правох.
Пригварки старших особох Покраїнскому омбудсманови, як и спознаная омбудсмана под час нащивох валалом, дзе старши у векшини, нєдвосмислово указую на тото же вельке число старих ма нєдостоїнствени живот на дружтвеней марґини – спозорює покраїнски омбудсман.
И Поверенїца за защиту ровноправносци Бранкица Янкович з нагоди Медзинародного дня старших особох вчера виявела же би младих требало воспитовац най почитую старши особи, а нє же би их дискриминовали.